直情去到沉迷嘅程度
一方面覺得好 inspiring
好想得到啟發
甚至會抄低結果
當提醒自己又好 記低睇下邊個準又好
我會同另一個同樣鍾意玩占卜（其實係佢導我入坑）分享邊個準
邊個占卜好玩 個結果係點
我個人雖然冷淡
但同呢個朋友維持到一種冷冷地但又好真心交流嘅狀態
咁樣對我來講係最舒服
佢早排提議我不如寫日記
想我對自己重新產生好奇
成日都聽人講做創作要對呢個世界好奇
我對呢個世界好奇 但我對自己唔好奇
呢個係咪一個問題
有時唔知點解望返自己會有一種難以理解嘅羞恥喺入面
我自己都解構唔到係咩
頭先睇咗兩集 Sharp Objects
我本身鍾意 Gillian Flynn 嘅書
雖然呢本我未睇完
劇中 Camille 上司一直想引發佢振作去寫嘢
當佢面對到過去就可以寫到好作品
對我嚟講幾有感覺
其實對於編劇呢個名我成日都好心虛
覺得自己唔稱職 縱使阿 sir 會話我 OK
我心虛嘅係我冇自己嘅創作
永遠好似寫唔到落去
開咗個頭就走咗去
亦唔知咩嘢 Topic 先係啱我
咁樣好痛苦
我信我係有我嘅價值
但我真係唔知究竟係咩嚟
上年去睇占星話我會寫得出好嘅作品
我好想寫得出
我覺得自己失去咗熱情太耐
好似一條永遠係解緊凍嘅屍體
點解人哋可以揮灑自如
點解我只可以做到職業殺手而唔係連環殺手
我都想寫得出人哋鍾意嘅作品
唔知點解睇完兩集劇好想打啲嘢
希望我會多返啲寫自己
No comments:
Post a Comment